Претседателот на Србија, Александар Вучиќ, повторно ја отвори можноста за повлекување од функцијата, наведувајќи дека по евентуалната оставка државата, согласно уставните процедури, би можела да влезе во изборен процес во рок од 90 дена. Изјавата ја даде за време на посетата на Кина.
Вучиќ објасни дека доколку поднесе оставка, претседателските надлежности привремено би ги презел претседателот на Народното собрание, а потоа би следувало распишување избори во законски предвидениот рок.
„Јас не го скратувам мандатот, туку би поднел оставка, бидејќи така е предвидено со Уставот“, изјавил Вучиќ, правејќи споредба со поранешниот српски претседател Борис Тадиќ.
Српскиот претседател нагласи дека не гледа политика како доживотна функција и порача дека не сака по секоја цена да остане на власт.
Сепак, Вучиќ засега не соопшти конкретен датум кога би можел да го направи тој чекор, што остава простор за различни политички сценарија во наредниот период.
Изјавите доаѓаат во време на зголемени политички тензии и протести во Србија, каде опозицијата и дел од јавноста бараат предвремени избори и политички промени.
Според уставната процедура во Србија, доколку претседателот поднесе оставка, новите претседателски избори мора да бидат организирани во рок од најмногу три месеци.
