Во Основниот кривичен суд во Скопје денеска започна судскиот процес против апелацискиот судија Ѓоко Ристов, кој се соочува со обвиненија за перење пари и противправно стекнување и прикривање имот. Случајот го води судијката Билјана Коцевска, долгогодишна колешка на Ристов од Апелациониот суд.
Ристов, кој во судницата бил донесен од судската полиција, се изјасни дека не се чувствува виновен за делата што му се ставаат на товар.
Во воведниот збор, обвинителката Искра Хаџивасилева истакна дека Обвинителството ќе докажува оти Ристов свесно ја прикривал својата вистинска имотна состојба и незаконски стекнал имот што значително ги надминува неговите законски приходи.
„Тој противправно стекнал и не пријавил 350.000 евра, што претставува износ еднаков на околу 450 просечни плати. Никогаш не го пријавил тој имот бидејќи нема законска основа за неговото потекло“, рече обвинителката.
Според обвинението, парите биле пронајдени скриени во тајно заѕидан простор зад кујна во семејната куќа на родителите на Ристов во Неготино. Банкнотите биле завиткани во алуминиумска фолија и сокриени зад плочки и кујнски елементи.
„Беа завиткани во фолии во банкноти од по 500 и по 200 евра, закопани во дупки во цигли и зад плочки. Парите потекнуваат од трговија со влијание и ние тоа ќе го докажеме“, изјави Хаџивасилева.
Таа нагласи дека обвинетиот давал лажни податоци за својата имотна состојба и не покажал каење за своите постапки.
Од друга страна, Ристов во својот воведен збор ги отфрли обвиненијата и најави дека ќе ги побива и двете кривични дела.
„Не се чувствувам виновен. Чувањето пари не е дејство на кривично дело“, изјави тој пред судот.
Според неговата одбрана, пронајдените средства не се негови, туку им припаѓаат на неговите родители и потекнуваат од продажба на земјиште.
Ристов тврдеше дека за да постои кривично дело перење пари, тие мора да бидат пуштени во легален финансиски промет.
„За да има перење пари, нечистите пари треба да станат легални преку финансискиот систем. Не постои кривично дело додека некој не ги пушти во оптек“, рече обвинетиот судија.
Во однос на обвинението за противправно стекнување и прикривање имот, тој посочи дека не располага со државен капитал и не е функционер кој носи одлуки за јавни средства.
„Јас не сум директор на МЕПСО или ЕСМ за да спроведувам тендери и да го оштетувам државниот буџет. Јас сум судија и не располагам со државен капитал“, нагласи Ристов.
Неговиот адвокат Ѕвонко Давидовиќ оцени дека обвинението се темели на претпоставки и сензационализам.
„Мојот клиент беше осуден во јавноста уште пред да почне судењето. Најдени се пари во ѕид на туѓа куќа и не постои доказ што го поврзува со неговата функција. Ќе докажеме дека неговите родители легално го стекнале тој имот“, изјави Давидовиќ.
Според информациите од истрагата, истражителите двапати вршеле претрес во семејната куќа во Неготино. При првиот претрес не успеале да ги пронајдат парите, иако располагале со оперативни сознанија за нивното постоење.
Скривалиштето било откриено на 18 јануари кога инспекторите забележале необичен звук при проверка на кујнскиот ѕид и неправилно поставена плочка. Со помош на специјална светлосна опрема бил забележан одблесок од алуминиумската фолија во која биле завиткани парите.
Во тајниот простор биле пронајдени 350.000 евра во готовина, спакувани во 13 пакети. Станува збор за 610 банкноти од по 500 евра и 225 банкноти од по 200 евра, при што дел од пакетите биле означени со рачно испишани износи.
Обвинението наведува дека откривањето на парите следувало по апсењето на адвокатот Фехмо Стафа, кој бил затекнат при примање 50.000 евра и според наводите од истрагата изјавил дека парите биле наменети за Ристов.
Обвинителството го товари Ристов дека од февруари 2020 година, како судија во Апелациониот суд Скопје, не ја пријавувал вистинската имотна состојба и давал неточни податоци за својот имот и имотот на членовите на семејството.
Според обвинението, вредноста на непријавениот имот значително ги надминува неговите законски приходи, а начинот на кој биле скриени парите дополнително упатува на сомнежи за перење пари и прикривање приноси од казниво дело.
Судењето продолжува на 10 јуни, кога Обвинителството ќе започне со изведување на материјалните докази.
