Земјотрес со јачина од 3,8 степени според Рихтеровата скала ноќеска ја погоди југоисточна Босна и Херцеговина, предизвикувајќи вознемиреност кај жителите во поширокиот регион.
Според податоците на сеизмолошките служби, потресот бил регистриран кратко по полноќ, а епицентарот се наоѓал на околу 11 километри северозападно од Требиње и 72 километри југоисточно од Мостар, на длабочина од 10 километри.
Поради близината на епицентарот до границите, тресењето било почувствувано не само во источна Херцеговина, туку и во делови од јужна Хрватска и Црна Гора. Граѓани од повеќе населени места на социјалните мрежи пријавија дека почувствувале силно нишање и краткотрајно тресење на објектите.
Европско-медитеранскиот сеизмолошки центар (EMSC) веднаш по потресот објави автоматско предупредување за можен земјотрес во регионот, по што следуваше и потврда на прелиминарните податоци.
Засега нема информации за материјална штета или повредени лица, а надлежните служби ја следат состојбата на терен.
Иако земјотресот не бил со голема магнитуда, жителите на погоденото подрачје сведочат дека потресот бил јасно почувствуван поради релативно малата длабочина на епицентарот.
Сеизмолозите потсетуваат дека подрачјето на Херцеговина се наоѓа во сеизмички активна зона каде повремено се регистрираат вакви земјотреси со слаб до умерен интензитет.
