Полициски службеници од СВР Битола пронајдоа 46 пакувања марихуана при акциска контрола на потегот меѓу селата Лажец и Граешница.
Како што информираат од Министерството за внатрешни работи, на 16 јуни околу 18:45 часот, при преземање службени дејствија, полициските службеници забележале лице кое не постапило по издадена усна наредба да застане.
Во обид да го сопрат, еден од полициските службеници испукал три предупредувачки куршуми во воздух, но лицето продолжило да бега. Притоа, фрлило торба и избегало од местото на настанот.
По извршено пребарување на теренот, полицијата пронашла три торби во кои имало вкупно 46 пакувања со марихуана.
Од МВР соопштуваат дека се преземаат мерки за идентификување и пронаоѓање на лицето, како и за целосно расчистување на случајот.
…
