Премиерот Христијан Мицкоски најави дека Македонија влегува во најголемиот инвестициски циклус во транспортната инфраструктура во последните децении, со проекти вредни повеќе милијарди евра, меѓу кои и изградба на брза железница долж Коридорот 10.
Според него, најзначајната инвестиција е изградбата на модерна железничка линија од Табановце до Гевгелија, по која патничките возови ќе се движат со брзина до 160 километри на час, а товарните композиции до 110 километри на час. Вредноста на проектот се проценува на околу 1,8 милијарди евра.
– Доколку сите подготовки завршат според планираното, до крајот на годинава очекуваме да почнат и првите активности на терен – изјави Мицкоски.
Тој истакна дека проектот ќе се реализира во соработка со Обединетото Кралство и меѓународни финансиски институции, со цел Македонија да стане важна транспортна артерија за патничкиот и товарниот сообраќај во регионот.
Премиерот информираше и дека продолжуваат активностите за изградба на железничката делница кон Бугарија, како дел од Коридорот 8, при што тунелите на трасата кон Крива Паланка веќе се пробиени. Владата, како што рече, останува посветена на реализацијата на овој проект, иако на бугарска страна не се забележува доволен теренски напредок.
Паралелно, се планира модернизација на железничката линија Скопје – Тетово – Гостивар, инвестиција вредна околу 284 милиони евра, која треба да ја подобри поврзаноста на Полошкиот Регион и да создаде предуслови за идно железничко поврзување со Албанија.
Во делот на патната инфраструктура, Мицкоски најави дека делницата Извор – Врбјани од автопатот Кичево – Охрид би можела да биде пуштена во употреба во септември или октомври годинава, додека целосното завршување на автопатот се очекува во првиот квартал од 2027 година.
Тој соопшти и дека е завршена тендерската постапка за автопатската делница Букојчани – Кичево, а во завршна фаза се процедурите за делницата Блаце – Скопје.
Осврнувајќи се на енергетските проекти Чебрен и Галиште, премиерот порача дека тие се од исклучително значење за енергетската независност на државата.
– Доколку е потребно, ќе ги реализираме и сами, без помош од страна – истакна Мицкоски.
…
