Тајванската армија испали ракети од американскиот ракетен систем ХИМАРС (High Mobility Artillery Rocket System) во рамки на воена вежба насочена кон демонстрирање на подготвеноста за одбрана од потенцијални кинески напади.
Ракетите биле истрелани од мобилни лансери како дел од обуката на тајванските вооружени сили, со цел тестирање на способностите за брзо распоредување и изведување прецизни удари. Од тајванската војска соопштија дека единиците успеале да ги маневрираат возилата и да ги испалат ракетите во рок од само три минути по добивањето на наредбата, демонстрирајќи високо ниво на мобилност и подготвеност.
Иако системот ХИМАРС и претходно бил тестиран, ова е првпат ракети да бидат истрелани кон водите на Тајванскиот Теснец, кој го разделува Тајван од Кина.
Тајванската армија најави дека ќе продолжи со обуките за користење на ХИМАРС „поради актуелната непријателска закана“, јасно алудирајќи на зголемените тензии со Кина, пренесува Си-Ен-Ен.
Испуканите ракети биле вежбовни и со намален дострел, поради што кратко по лансирањето паднале во водите на теснецот.
Кина го смета Тајван за своја отцепена провинција и во повеќе наврати истакнала дека островот во иднина треба да биде ставен под нејзина контрола. Во последните години, кинески воени бродови и авиони речиси секојдневно изведуваат активности во близина на островот, што властите во Тајван го оценуваат како обид за заплашување и зголемување на притисокот врз нивната безбедност.
