Во финска Лапонија започнува необична туристичка атракција – летна потрага по златна прачка вредна 20.000 евра, која привлекува голем интерес кај посетителите.
Иницијативата, наречена „Лов на полноќното сонце“, им овозможува на туристите да ја истражуваат арктичката природа и да учествуваат во авантура низ пределите на Леви, познат туристички центар над Арктичкиот круг.
Според Visit Levi, играта започнува на 18 јуни во центарот за посетители, каде учесниците добиваат први траги и упатства за почеток на потрагата.
Потоа, нови насоки ги водат низ локални патеки, природни атракции и знаменитости, сè до можната локација на скриената златна награда.
Организаторите посочуваат дека златната прачка може да биде пронајдена во било кој момент од играта, додека дополнителни траги ќе се објавуваат во текот на летото, сè до 22 август.
Леви, кој е познат како популарен зимски ски-центар, во летниот период нуди сосема поинакво искуство, особено поради феноменот на „полноќното сонце“, кога сонцето не заоѓа со денови.
Оваа поинаква туристичка понуда се смета за обид да се промовира летната сезона во Лапонија, која сè уште е помалку позната на меѓународните посетители.
…
