Цигарите во Германија би можеле значително да поскапат во наредните години, во рамки на плановите на Министерството за финансии за постепено зголемување на даноците на тутунските производи.
Според нацрт-законот што го објави ДПА, просечната цена на пакет од 20 цигари би можела да порасне од околу 8,80 евра во 2027 година на приближно 11,40 евра до 2030 година.
Во документот се наведува дека даночната компонента во малопродажната цена би се зголемила од околу 4,40 евра на 5,75 евра по пакет, а зголемувањето би се однесувало и на други тутунски производи.
Портпарол на германското Министерство за финансии изјави дека предлогот има за цел и заштита на јавното здравје, како и намалување на стапките на пушење кај младите и возрасните. Тој додаде дека мерката ќе придонесе и за консолидирање на јавните финансии.
Според проценките на Министерството, новите даночни мерки би можеле да донесат значителни дополнителни приходи во буџетот – околу 756 милиони евра во 2027 година, 1,6 милијарди евра во 2028 година, 2,5 милијарди евра во 2029 година и до 3,6 милијарди евра во 2030 година.
Иако цените ќе растат, цигарите во Германија сè уште се релативно поевтини во споредба со дел од западноевропските земји. Според Германското здружение на цигари, просечната цена на кутија од 20 цигари во 2024 година изнесувала 7,33 евра, додека во соседна Франција таа изнесувала 12,07 евра.
…
