Од полноќ се намалуваат малопродажните цени на нафтените деривати, соопшти Регулаторната комисија за енергетика, водни услуги и услуги за управување (РКЕ). Намалувањето во просек изнесува 6,61% во однос на претходната одлука од 15 јуни.
Според новата одлука, малопродажната цена на ЕУРОСУПЕР БС-95 се намалува за 3,50 денари за литар и ќе изнесува 84 денари. ЕУРОСУПЕР БС-98 поевтинува за 4,00 денари и новата цена ќе биде 86 денари за литар.
Дизел горивото бележи најголемо намалување од 7 денари по литар, па новата цена ќе изнесува 80,50 денари.
Од РКЕ појаснуваат дека корекцијата на цените е резултат на намалување на референтните цени на светскиот пазар. Во споредба со претходната пресметка, бензините бележат пад од 8,216%, дизелот за 12,699%, екстралесното масло за 12,354%, а мазутот за 11,352%.
…
