Мостар денеска се соочува со сериозна еколошка и безбедносна криза откако голем пожар избувна на градската депонија, при што густ чад се прошири кон околните населени места.
Во гаснењето на пожарот од утринските часови се вклучени повеќе противпожарни екипи со специјализирани возила, припадници на вооружените сили со цистерни, како и авион „Ер Трактор“ кој интервенира од воздух.
Според локалните власти, огнот зафатил материјали во подлабоките слоеви на депонијата, поради што се создава големо количество чад исполнет со штетни честички. Граѓаните се предупредени да избегнуваат престој на отворено, да ги затворат прозорците и вратите на домовите и да ги ограничат сите активности во близина на депонијата.
Особена претпазливост се препорачува во текот на ноќта и раните утрински часови, кога поради временските услови чадот се задржува поблиску до земјата.
Надлежните институции дополнително апелираа жителите во околината да не користат вода од отворени бунари и природни извори сè додека санитарните и епидемиолошките служби не потврдат дека водата е безбедна за употреба.
Пожарот во текот на денот се проширил и на магацини и други деловни објекти во рамки на депонијата, а зафатил и складиште со стари гуми. Од местото на настанот се слушнале и повеќе експлозии, за кои локалните медиуми наведуваат дека најверојатно потекнуваат од плински боци.
Сите вработени на депонијата биле навремено евакуирани. На терен пристигнал и градоначалникот на Мостар, Марио Кордиќ, додека Федералното министерство за животна средина и туризам побарало итно преземање на сите неопходни мерки за намалување на последиците врз здравјето на граѓаните и животната средина.
Potpuna apokalipsa u #Mostar pic.twitter.com/o948RgiQee
— Bljesak.info (@Bljesak) June 22, 2026
…
