Американскиот претседател Доналд Трамп предупреди дека САД ќе одговорат жестоко на секој евентуален ирански напад врз бродови во Ормутскиот теснец, наведувајќи дека можни цели би можеле да бидат и важни инфраструктурни објекти во Иран.
Во објава на својата социјална мрежа Truth Social, Трамп порача дека американската војска би можела да нападне мостови, електрани и други објекти „во близина на Техеран или во самиот главен град“, доколку иранските сили нападнат брод во стратешки важниот морски премин.
Тој нагласи дека одговорот на САД би следел без разлика дали нападот ќе биде извршен со ракети, беспилотни летала или друго оружје.
Изјавата доаѓа во период на зголемени тензии, откако САД продолжија со нападите врз цели во Иран единаесетта ноќ по ред. Од друга страна, Техеран повторно го предупреди Вашингтон да не ги напаѓа неговите нуклеарни објекти, што дополнително ја зголемува загриженоста од можна понатамошна ескалација на конфликтот.
…
