Грејната сезона во Скопје ќе започне утре, 13 октомври, два дена пред официјално предвидениот почеток. Од ЕСМ Снабдување со топлина соопштија дека прогнозираниот пад на температурите ги исполнува условите за порано вклучување на централното греење.
Одлуката се однесува на потрошувачите приклучени на системите со кои управува АД ЕСМ преку ЕСМ Снабдување со топлина и Подружница „Енергетика“.
Според прогнозата на Управата за хидрометеоролошки работи, средната надворешна температура за 13 октомври ќе изнесува 12 Целзиусови степени. Регулативата дозволува испораката да започне пред 15 октомври кога прогнозираната средна температура за следниот ден е еднаква или пониска од оваа вредност.
До официјалниот почеток на сезоната, ЕСМ секојдневно ќе објавува информации на својата веб-страница за исполнетоста на условите за греење наредниот ден.
Испораката во октомври и во првата половина од ноември ќе се приспособува на временските услови. При пониски температури ќе се зголемува, а при повисоки ќе се намалува. Кога ќе се достигнат утврдените температурни граници, системот ќе се исклучува и повторно ќе се вклучува по падот на температурите.
Од ЕСМ повторно ги повикаа потрошувачите да ги завршат подготовките и интервенциите на внатрешните грејни инсталации. Заедниците на сопственици треба да обезбедат пристап до потстаниците, исправни електрични инсталации и редовно напојување со струја, како и подмирени сметки за електрична енергија.
Потрошувачите можат на веб-страницата на компанијата да проверат дали нивната зграда е на списокот на објекти што немаат услови за испорака на топлина.
За пријавување дефекти и завршени интервенции достапни се броевите 02 3076 200 и 075 400 100 на ЕСМ Снабдување, како и 02 3104 816 и 02 3104 872 на ЕСМ Енергетика.
…
