Американскиот претседател Доналд Трамп упати остри критики кон големите нафтени компании, обвинувајќи ги дека не ги намалуваат цените на горивата во согласност со падот на цената на суровата нафта на светските пазари.
Во објава на социјалната мрежа Truth Social, Трамп оцени дека потрошувачите се оштетени бидејќи компаниите продолжуваат да наплатуваат високи цени на бензинските пумпи и покрај значителното намалување на трошоците за набавка на нафта.
„Големите нафтени компании не ги намалуваат цените на бензинските пумпи пропорционално со наглото намалување на цените што тие ги плаќаат за нафтата. Тие цени паѓаат како камен. Со други зборови, потрошувачите се ограбуваат“, напиша Трамп, додавајќи дека му наложил на Министерството за правда да ја испита ситуацијата.
Цените на нафтата во изминатите месеци беа под силно влијание на тензиите меѓу САД и Иран. По наглиот раст што следуваше по американската операција против Иран и затворањето на Ормускиот Теснец, нафтените пазари почнаа да се стабилизираат по најавите за можен мировен договор.
Американската сурова нафта WTI во март достигна 119,47 долари за барел, додека цената на Brent нафтата во април се искачи на 126,41 долари за барел, највисоко ниво во последните повеќе од четири години. Во меѓувреме, цените значително се намалија, па во средата Brent се тргуваше по 76,22 долари за барел, а WTI по 72,28 долари.
Падот на цената на суровата нафта се одразува и врз малопродажните цени на горивата во САД. Според податоците од 23 јуни, националната просечна цена на еден галон обичен бензин изнесувала 3,926 долари, што е за 56 центи помалку во споредба со пред еден месец, кога просекот изнесувал 4,529 долари.
Сепак, Трамп смета дека намалувањето не е доволно брзо и бара дополнителен пад на цените за американските потрошувачи.
…
