Германскиот автомобилски гигант „Фолксваген“ подготвува обемна реорганизација која може да донесе драстични промени во работењето, вклучително масовно намалување на бројот на вработени и затворање на дел од производствените капацитети во Германија.
Според извештаи на германски медиуми, раководството на групацијата разгледува план кој предвидува укинување на до 100.000 работни места и затворање на четири фабрики. Планот, како што се наведува, бил презентиран од извршниот директор Оливер Блуме пред врвното раководство, а конечна одлука треба да донесе Надзорниот одбор на состанок закажан за 9 јули.
Меѓу фабриките кои се споменуваат во планот се погони во Хановер, Цвикау и Емден, како и фабрика на „Ауди“ во Некарсулм. Според информациите, производството во овие капацитети би се прекинало по завршување на актуелните модели, без нивна замена со нови.
Реализацијата на затворањето, според проценките, би се одвивала во периодот меѓу 2030 и 2033 година, во согласност со претходни договори со синдикатите.
Покрај затворањата, планот предвидува и организациски промени, вклучително издвојување на брендот „Фолксваген“ и делот за автомобилски компоненти во посебни компании, со цел полесно прибирање капитал и поголема флексибилност во работењето.
Паралелно се разгледува и намалување на инвестициите за околу 15 проценти во наредните пет години, што би значело вложувања од нешто над 130 милијарди евра.
Причините за ваквите мерки се поврзуваат со пад на профитот и растечки трошоци. Во првиот квартал годинава, нето-добивката на групацијата е намалена за 28 проценти, додека приходите бележат пад од два проценти.
Дополнителен притисок врз компанијата создаваат и американските царини, како и засилената конкуренција на кинескиот пазар, каде „Фолксваген“ ја изгуби водечката позиција.
…
