Македонскиот пејач Давид Грујевски е победник на првата сезона од регионалното музичко шоу „Хајп Ѕвезди“, откако во големото финале доби најголема поддршка од публиката преку СМС-гласањето и ја понесе титулата „прва ѕвезда на Хајп“. Со победата, Грујевски ја освои и главната награда во износ од 50.000 евра.
Во финалната вечер настапија 20 финалисти од повеќе земји од регионот, а победникот беше избран исклучиво со гласовите на публиката. Грујевски настапи како натпреварувач со реден број 16 и се претстави со песната „Боже, чувај ја од зло“ од Тоше Проески, а потоа ја изведе и македонската народна песна „Море сокол пие“, со што ја освои поддршката од гледачите.
Во текот на целата сезона, Грујевски беше меѓу највпечатливите натпреварувачи. Во полуфиналето освои 46 поени со изведбата на безвременскиот хит „Ostala si uvijek ista“, со што го обезбеди своето место во големото финале, каде што на крајот триумфираше и ја понесе титулата победник на првата сезона на „Хајп Ѕвезди“.
Успехот на македонските претставници беше заокружен и со пласманот на Слободанка Танева, која го освои третото место, додека Сања Тодоровиќ ја доби специјалната награда на стручното жири во вредност од 10.000 евра. Така, македонските натпреварувачи оставија силен белег во првата сезона на регионалното музичко шоу.
Покрај главната награда од 50.000 евра за победникот, од продукцијата соопштија дека сите 20 финалисти ќе добијат авторска песна и музички спот како поддршка за нивниот понатамошен развој на музичката кариера.
…
