Денес, на крајот на јуни, на територијата на земјата беа регистрирани два сериозни пожари на отворен простор – во Велес и во Дојран.
Според последните информации од надлежните служби, по целодневна интервенција, двата пожари се ставени под контрола, но сè уште не се целосно изгаснати. На терен во Велес беше ангажиран и еден „Ер трактор“, кој интервенираше од воздух во обид да се спречи понатамошно ширење на огнот.
Во овој пожар беа зафатени викендици, стари куќи и овоштарници, што предизвика материјална штета во погоденото подрачје.
Ова е четврта интервенција на воздухопловната противпожарна единица во текот на летната сезона, по претходни акции во Штип, Велес и Свети Николе.
Во текот на летниот период, подрачјето Велес – Свети Николе – Штип останува едно од најпогодените од пожари, каде досега се регистрирани десетина посериозни инциденти, при што во дел од случаите била зафатена и борова шума.
Според дневните извештаи на Центарот за управување со кризи, и понатаму значителен проблем претставуваат пожарите на депонии, најчесто диви, кои поради неконтролирано ширење излегуваат надвор од нивните граници и дополнително ја отежнуваат интервенцијата на пожарникарите.
…
