Бројот на боледувања во јавниот сектор останува висок, а надлежните повторно најавуваат законски измени со кои ќе се зајакне контролата врз нивното издавање, по повеќе откриени случаи на злоупотреба во текот на годинава.
Според податоците, во моментов има околу 17.000 активни боледувања поради болест и уште околу 10.000 породилни боледувања. Особено загрижува состојбата во одредени институции, каде процентот на отсутни вработени е значително висок.
Во здравствениот сектор, на поединечни клиники дури 20 проценти од вработените се на боледување, додека висок број отсуства е евидентиран и во полицијата, царината и секторот за одбрана.
Од Фондот за здравствено осигурување посочуваат дека околу 50 проценти од боледувањата се поврзани со заболувања на ’рбетниот столб, како спондилоза и лумбаго. Станува збор за состојби кај кои проценката на работоспособноста често зависи од субјективна медицинска оценка, што остава простор за можни злоупотреби.
Дополнително, во дел од јавниот сектор колективните договори предвидуваат исплата од 90 до 100 проценти од платата за време на боледување, што, според Фондот, може да влијае врз зачестеното користење на ова право. Надлежните наведуваат дека се регистрирани и случаи во кои боледувањето се користело за извршување други работни активности, како земјоделски работи или работа на друго место.
Потребата од законски измени беше најавена уште во 2025 година, кога од Фондот оценија дека постојниот систем не овозможува доволно ефикасна контрола. По неодамнешните откриени злоупотреби, реформите повторно се актуелизирани.
Со најавените измени на Законот за здравствена заштита се очекува воведување построги механизми за контрола, со цел да се спречат злоупотребите и правото на боледување да го користат само лицата на кои навистина им е неопходно.
…
