Американскиот претседател Доналд Трамп изјави дека, според него, договорот за прекин на огнот меѓу САД и Иран повеќе не важи, коментирајќи ги најновите воени случувања меѓу двете земји.
Одговарајќи на новинарско прашање за време на средбата со генералниот секретар на НАТО, Марк Руте, во Анкара, Трамп рече дека не очекува понатамошен напредок во разговорите со Техеран.
„За мене, примирјето е завршено. Не сакам повеќе да се занимавам со нив. Ќе разговарам со нашите преговарачи бидејќи тие сакаат да продолжат со разговорите, но според мене тоа е губење време“, изјави Трамп.
Тој се осврна и на американските воени операции, нагласувајќи дека САД возвратиле по иранските напади.
„Нашата војска дејствуваше многу силно синоќа. Им дадовме јасно предупредување, но тие продолжија со ракетните напади и нападите врз бродови. Поради тоа следуваше жесток одговор“, рече американскиот претседател.
Според Трамп, американските напади биле „дваесет пати помоќни“ од претходните ирански напади.
Потсетуваме, САД и Иран на 17 јуни потпишаа меморандум за разбирање со кој беше прекината меѓусебната воена ескалација и беше договорен 60-дневен период за преговори со цел постигнување траен мировен договор. Сепак, најновите вооружени судири дополнително ги зголемија сомнежите дека дипломатскиот процес е сериозно нарушен.
