Повеќе скопски населби и приградски населени места вечерва останаа без вода поради голем дефект на главната водоводна мрежа во Кисела Вода.
Според информациите од ЈП „Водовод и канализација“ – Скопје, станува збор за уличен дефект на цевка со голем профил Ф-600 милиметри на улицата „Борис Трајковски“ бб, пред главниот влез на поранешната фабрика ОХИС.
Поради дефектот, водоснабдувањето е прекинато од 18:30 часот.
Повеќе населени места без вода
Прекинот ги засега корисниците во Пинтија и Усје, Долно Лисиче и Драчево, како и во Батинци, Студеничани, Моране и Зелениково.
Екипите на јавното претпријатие се на терен и работат на отстранување на дефектот.
Нормализирањето на водоснабдувањето се очекува по целосното санирање на оштетувањето, а интервенцијата треба да продолжи и во текот на ноќта.
Втор сериозен дефект во истиот реон во еден ден
Ова е втор поголем проблем со водоводната мрежа во овој дел од Скопје во текот на денот.
Претходно, околу 9 часот утрово, бил регистриран дефект во непосредна близина, кај бензинската пумпа „Лукоил“ на улицата „Борис Трајковски“.
Тој дефект предизвикал проблеми со притисокот и водоснабдувањето во околните објекти во текот на претпладневните часови.
Надлежните екипи продолжуваат со интервенцијата на големиот дефект кај ОХИС, а водоснабдувањето ќе биде воспоставено по завршувањето на санацијата.
