Три млади лица, меѓу кои и двајца 15-годишници, денеска биле спасени од водите на реката Треска, откако силниот воден тек, предизвикан од зголемен испуст од браната „Матка“, ги однел додека се капеле.
Според информациите од Центарот за управување со кризи (ЦУК), преку Единствениот број за итни повици 112 била примена пријава за лицата кои биле зафатени од надојдената вода. Едното малолетно лице веднаш било извлечено од реката, додека другото малолетно лице и 18-годишникот биле пронајдени низводно по течението на Треска.
Сите три лица се спасени, живи се и, според првичните информации, немаат видливи повреди.
По пријавата, ЦУК веднаш ја координирал спасувачката акција, во која биле вклучени Министерството за внатрешни работи, Дирекцијата за заштита и спасување, Општина Сарај, ХЕЦ „Матка“, Бригадата за противпожарна заштита на Град Скопје и Итната медицинска помош.
На местото на настанот пристигнал и директорот на Центарот за управување со кризи, Али Мухамет, кој ја следел и координирал интервенцијата. Во акцијата учествувале пожарникари, полициски службеници, екипи на Итната медицинска помош, како и жители на Општина Сарај.
Од Центарот за управување со кризи апелираат до граѓаните да бидат исклучително внимателни при престој покрај реки и езера, особено во близина на брани и хидроенергетски објекти, каде што нивото и брзината на водата можат нагло да се променат поради контролирани испусти.
…
