Поранешниот врховен командант на Вооружените сили на Украина, Олександр Сирски, се обрати до украинската јавност и до припадниците на армијата по неговото разрешување од функцијата. Украинскиот претседател Володимир Зеленски го замени со генералот Михајло Драпати.
Во својата последна порака како врховен командант, Сирски се осврна на најважните моменти од својата воена кариера, потсетувајќи на одбраната на Киев во 2022 година, контраофанзивата во Харковската област, битките во Доњецк и операциите што, според него, придонеле за промена на текот на војната.
Тој нагласи дека една од најтешките одлуки во неговиот мандат била организираното повлекување од Авдијивка, истакнувајќи дека приоритет му било спасувањето на животите на украинските војници.
Сирски посочи дека за време на неговото раководење армијата била модернизирана, биле формирани Силите за беспилотни системи, а биле воведени и нови модели на воздушна одбрана и организација на воените единици. Според него, армијата што ја остава зад себе е во подобра позиција и има иницијатива на делови од фронтот.
„Без оглед на мојата функција, ќе ѝ служам на Украина до победата“, порача Сирски, заблагодарувајќи им се на војниците, офицерите и семејствата на загинатите борци.
Неговото разрешување следува по неколкудневни протести во Киев и во други украински градови, каде дел од демонстрантите, ветераните и војниците бараа промени во воениот врв.
На чело на украинската армија е назначен 44-годишниот генерал Михајло Драпати, кој важи за командант со пофлексибилен пристап во раководењето и ужива поддршка меѓу дел од воениот кадар и јавноста. Според достапните информации, од него се очекува да продолжи со реформите и да ја води армијата во следната фаза од војната.
…
