Жителите на Валандово добија итно предупредување да не ја користат водата од градскиот водовод за пиење, откако лабораториските анализи покажале зголемено присуство на арсен.
Од ЈП „Комунален сервис“ – Валандово информираа дека резултатите од испитувањата, извршени од Институтот за јавно здравје – Скопје, покажале дека водата моментално не ги исполнува условите за безбедна употреба како вода за пиење.
Надлежните апелираат граѓаните строго да ја почитуваат препораката и до понатамошно известување да не ја консумираат водата од чешмите. Таа засега може да се користи само за технички потреби.
Во меѓувреме, комуналното претпријатие, во координација со здравствените институции, спроведува дополнителни анализи и контроли на повеќе локации во водоводниот систем за да се утврди причината за зголеменото ниво на арсен и да се потврди кога водата повторно ќе биде безбедна.
Од ЈП „Комунален сервис“ најавуваат дека јавноста ќе биде навремено информирана веднаш по добивањето на новите резултати од анализите и по потврдата дека водата е повторно исправна за пиење.
…
