Иран започна забрзана обнова на дел од инфраструктурата оштетена во воздушните напади на САД и Израел, што предизвикува загриженост кај дел од израелските претставници, објавува „Волстрит џурнал“, повикувајќи се на западни и израелски извори и анализа на сателитски снимки.
Според извештајот, и покрај интензивните воздушни операции во кои биле извршени илјадници напади врз различни цели, Техеран успеал релативно брзо да започне поправки на оштетени ракетни бази, мостови, пристаништа и индустриски капацитети.
Сателитските снимки покажуваат дека на некои локации, каде што биле погодени влезови во подземни ракетни комплекси, Иран започнал со расчистување на теренот, изградба на нови пристапни патишта и обновување на објектите.
Особено внимание привлекуваат ракетните бази во западниот дел на земјата, каде што, според анализите, работите на санација започнале само неколку недели по нападите. Израелски претставници посочуваат дека Иран задржал значителен дел од техничкото знаење и капацитетите потребни за повторно воспоставување на производството.
„Иран обновува сè“, изјавил еден израелски функционер запознаен со воените проценки, додавајќи дека брзината на реконструкцијата создава дополнителна загриженост во Израел.
Поранешниот командант на израелските сили за воздушна и ракетна одбрана, Ран Кочав, оценил дека Иран и претходно покажал способност за брзо обновување на својата инфраструктура и ракетни залихи по претходните конфликти.
Од друга страна, американската администрација тврди дека воените операции нанеле сериозна штета врз иранските ракетни капацитети, производството на оружје и воената инфраструктура. Вашингтон оценува дека кампањата претставувала голем успех, додека Техеран продолжува да покажува отпор и да ги обновува погодените објекти.
Според воени аналитичари, главниот предизвик за САД и Израел е што голем дел од иранските капацитети се распоредени во подземни и заштитени објекти, што го отежнува нивното целосно уништување.
Сателитските снимки исто така укажуваат на активности за реконструкција во неколку индустриски и поморски објекти, што според израелските проценки покажува дека Иран и понатаму располага со значителни ресурси за обновување на своите способности.
Иако конфликтот нанесе големи материјални штети, брзото закрепнување на дел од иранската инфраструктура отвора нови прашања за долгорочниот ефект од воздушните напади и нивната способност трајно да ги ограничат воените капацитети на Техеран.
…
