Голема паника избувна во метрото во Барселона откако пожар предизвика густ чад во дел од подземниот систем, при што 137 лица побарале медицинска помош.
Инцидентот се случил меѓу станиците „Глориес“ и „Клот“, каде што патниците останале заробени откако воз се заглавил во тунел. Поради брзото ширење на чадот, дел од патниците во паника ги отвориле вратите и почнале да се евакуираат пеш низ тунелот.
На местото веднаш пристигнале екипи на итната медицинска помош и пожарникари, кои помогнале во евакуацијата и укажале помош на повредените.
Според здравствените служби, најголем дел од лицата имале полесни повреди, главно поради вдишување чад и стрес. Шест лица се здобиле со посериозни симптоми, а 39 повредени биле транспортирани во болници. Во интервенцијата учествувале 24 амбулантни возила.
Директорот на „Транспорт Метрополитанс де Барселона“, Ксавиер Флорес, изјави дека пожарот бил предизвикан од уривање на дел од облогата на контактната мрежа (катенаријата), што довело до создавање чад.
Ова е втор посериозен инцидент во метрото во Барселона за краток период. Само неколку дена претходно, експлозија предизвикана од истекување на гас повреди осум лица.
Надлежните служби продолжуваат со истрагата за да се утврдат точните причини за несреќата и да се провери безбедноста на системот.
…
