Убава и позитивна вест доаѓа од Општата болница во Кочани, каде во изминатите два дена на Гинеколошко-акушерското одделение се родиле вкупно седум бебиња.
Сите породувања биле по природен пат, а на свет дошле четири машки и три женски бебиња.
Од болницата велат дека се надеваат оти ваквиот позитивен тренд ќе продолжи и во периодот што следи, со што Кочани би бележел сè поголем број породувања.
„Ова е една позитивна вест. Во последните два дена имавме седум породувања по природен пат – четири машки и три женски бебиња. Се надеваме дека ваквиот тренд ќе продолжи и понатаму и ќе има што повеќе породувања“, изјави за Радио Кочани директорката на Општата болница, Катерина Паниќ Мирчовска.
Дополнителен позитивен чекор за унапредување на здравствените услуги е тоа што од оваа година во Општата болница во Кочани работат тројца специјалисти по гинекологија и акушерство.
Со нивното ангажирање се зајакнува кадровската поддршка на Гинеколошко-акушерското одделение, а истовремено се подобрува и грижата за идните мајки.
Седумте новороденчиња за само два дена се убав повод за радост и надеж дека позитивниот тренд ќе продолжи и дека во Кочани во иднина ќе има уште повеќе породувања.
