Регионален патнички авион на Ер Канада експрес се судри со интервентно противпожарно возило на пистата по слетувањето на аеродромот ЛаГвардија во Њујорк, предизвикувајќи сериозен безбедносен инцидент и целосен прекин на воздушниот сообраќај.
Несреќата се случила доцна во неделата, на 22 март околу 23:47 часот, кога авионот при движење по пистата директно удрил во возило за спасување и гасење пожари, кое интервенирало по друг настан на теренот.
Според податоците од платформата Флајтрадар24, авионот во моментот на ударот се движел со брзина од околу 24 милји на час. Станува збор за лет CRJ-900 кој пристигнувал од Монтреал, при што во леталото имало 72 патници и четворица членови на екипажот.
Летот го оперирала компанијата Џез авиејшн, регионален партнер на Ер Канада, а двете компании го потврдија инцидентот.
По сударот веднаш биле активирани сите безбедносни протоколи, а аеродромот бил целосно затворен за сообраќај со цел непречена интервенција на службите и започнување истрага за причините за несреќата. Федералната управа за воздухопловство воведе итен прекин на летовите, додека пристигнувачките авиони биле пренасочени кон други аеродроми или вратени кон почетните дестинации.
Надлежните најавуваат детална истрага која треба да ги утврди околностите под кои дошло до судирот.
