Ќе се гради експресен пат од Радовиш, преку Струмица, до Ново Село и границата со Бугарија, најави вицепремиерот и министер за транспорт Александар Николоски.
Според него, веќе е започната постапката за избор на проектантска и консултантска куќа која треба да ја подготви целокупната документација за проектот. Во рамки на подготовките треба да се изработат предпроектна документација, еколошки и социјални студии, како и физибилити студија.
Рокот за поднесување понуди е до 8 октомври, по што се очекува избор на консултантската куќа. Студиите, според најавите, треба да бидат завршени во рок од шест до девет месеци, по што би следувал тендер за избор на изведувач.
Николоски посочи дека проектот ќе се финансира со сопствени средства на Јавното претпријатие за државни патишта.
„Нашата идеја е да се изгради експресен пат кој што ќе оди од Радовиш преку Струмица, па сѐ до Ново Село – граница со Бугарија и на тој начин да имаме уште едно поврзување со Република Бугарија“, изјави Николоски.
Тој додаде дека, доколку постапките се одвиваат според планираното, градежните активности на терен би можеле да започнат до есента следната година.
При посетата на Радовиш, Николоски информираше и дека во општината се инвестираат повеќе од 250 милиони денари за подобрување на инфраструктурата и локалниот развој.
Во завршна фаза е и изградбата на новиот Градски пазар, кој според најавите треба да биде пуштен во употреба за околу еден месец. Инвестицијата е вредна околу два милиони евра и се финансира од буџетот на Општина Радовиш.
…
