Западнонилската треска е вирусно заболување кое се пренесува најчесто преку убод од заразен комарец. Симптомите може да се појават неколку дена по инфекцијата, но кај голем дел од заразените лица болеста поминува без симптоми.
Кај лицата кај кои ќе се појават симптоми, најчесто се јавуваат покачена телесна температура, главоболка, замор, слабост и болки во мускулите и зглобовите. Може да се појават и мачнина, повраќање, осип на кожата и зголемени лимфни јазли.
Во поретки случаи, инфекцијата може да прерасне во потешка форма и да го зафати нервниот систем, предизвикувајќи воспаление на мозокот или мозочните обвивки.
Предупредувачки симптоми се многу силна главоболка, висока температура, вкочанет врат, збунетост, нарушување на свеста, мускулна слабост, грчеви или губење на свеста. При појава на вакви симптоми потребно е веднаш да се побара медицинска помош.
Важно е да се знае дека симптомите не се доволни за сигурно утврдување на инфекцијата. Доколку постои сомнеж за западнонилска треска, лекарот може да побара соодветни лабораториски испитувања.
Најдобра заштита од инфекцијата е избегнување убоди од комарци, особено во периодите кога тие се најактивни, како и користење средства за заштита од комарци и мрежи на прозорците.
…
