Од коалицијата ВЛЕН обвинуваат дека во Демократската унија за интеграција (ДУИ) повторно се одвиваат внатрепартиски пресметки, во кои, според нив, се вмешани Али Ахмети, Артан Груби и Бујар Османи.
Во реакцијата на ВЛЕН се наведува дека Али Ахмети, иако наводно размислува за повлекување од лидерската позиција, преку своите потези дополнително ги продлабочува поделбите во партијата.
„Ахмети повторно ја игра играта со две лица. Од една страна, наводно се обидува да го спаси Артан од апсење, а од друга страна, преку Артан му подметнува на Бујар“, обвинува ВЛЕН.
Од коалицијата тврдат дека веќе подолго време во ДУИ се зборува оти Бујар Османи, зад затворени врати, бара Ахмети да се повлече за партијата повторно да стане конкурентна опозиција. Според ВЛЕН, Османи ја очекува можноста да застане на чело на ДУИ.
ВЛЕН смета дека не е случајно што Ахмети повторно ја актуелизира приказната за своето повлекување од лидерската позиција.
„Наводно сака да се повлече, но луѓето околу него не му дозволуваат“, наведуваат од коалицијата.
Во реакцијата се обвинува Ахмети дека се обидува да го продлабочи конфликтот меѓу Артан Груби и Бујар Османи, посочувајќи го Османи како виновник за ставот на ДУИ во врска со обвинението за „Државна лотарија“.
ВЛЕН тврди дека во ДУИ има сериозни несогласувања и дека луѓето околу Артан Груби преку јавни настапи веќе испраќаат пораки.
„До вчера му велеа ‘шеф’, ‘брат’ и ‘кинг’, а денес сите ги кренаа рацете и се прават дека не го познаваат“, се наведува во реакцијата.
Од ВЛЕН оценуваат дека сега „топката е кај Артан“, а она што тој би го кажал пред органите на правдата би можело да има сериозни последици врз актуелното раководство на ДУИ.
„Во Мала Речица не спијат мирно. Некои се плашат од она што го знае Артан, други од она што може да го каже, а трети веќе пресметуваат кого би можел да повлече со себе“, стои во реакцијата на ВЛЕН.
Од коалицијата упатуваат и остри обвинувања кон раководството на ДУИ, оценувајќи дека партијата, според нив, одамна не функционира само како политичка организација, туку како структура во која главниот интерес се тендерите и личните интереси.
ВЛЕН заклучува дека прашањата поврзани со правата на Албанците, според нив, се користат како оправдување за политиките на актуелното раководство на ДУИ.
…
