Какви материјали биле вградени во дискотеката „Пулс“, како огнот успеал толку брзо да го зафати објектот и какви градежни зафати биле правени пред трагедијата – ова беа дел од главните теми на денешното судско рочиште за пожарот во Кочани.
Пред судот сведочеше и одговараше на прашања професорот Горан Марковски од Градежниот факултет во Скопје, како предводник на тимот што го изработил вештачењето за објектот.
Еден од најважните делови од расправата се однесуваше на материјалот поставен на спуштениот плафон. Според вештачењето, станувало збор за полиуретански сунѓер кој бил користен за акустична изолација. Меѓутоа, по пожарот не останал примерок што би можел директно да се испита, бидејќи материјалот бил целосно уништен од огнот.
Вештаците до овој заклучок дошле преку анализа на фотографии и видео-снимки, како и со споредување на други вештачења и трагите што биле пронајдени по пожарот.
Одбраната поставувала прашања и за динамиката на пожарот, односно колку брзо се ширел огнот низ просторот. При проценката биле користени информации од противпожарните екипи, снимки направени во критичните моменти и изјави, а земени биле предвид и карактеристиките на материјалите кога се изложени на високи температури.
Во вештачењето биле опфатени и преградните ѕидови во дискотеката. За ѕидовите направени од гипс-картонски плочи било утврдено дека ги исполнувале условите за потребната пожарна отпорност.
Посебен сегмент од расправата се однесуваше на градежните промени направени во 2012 година, кога објектот бил реконструиран и приспособуван за да функционира како дискотека. Тогаш, меѓу другото, била дополнително зајакната меѓукатната конструкција со челични греди.
Според објаснувањето дадено во судницата, потребата од вакво зајакнување произлегла од новото оптоварување на конструкцијата по пренамената на објектот. Одбраната, сепак, побарала попрецизни одговори за тоа како и врз основа на кои докази била утврдена точната временска рамка на изведените интервенции.
Се анализирале и двете галерии кои биле изградени во 2012 година, а биле отстранети 12 години подоцна. Во текот на испитувањето било посочено дека нивното поставување имало влијание врз одделни конструктивни делови од објектот.
Покрај техничките аспекти на вештачењето, повторно се наметна и прашањето дали институциите навреме и соодветно ја вршеле својата законска улога во контролата на објектот. Семејствата на жртвите сметаат дека наодите не зборуваат само за состојбата во „Пулс“, туку отвораат дилеми и за пропустите на институциите што биле задолжени за надзор.
Во пожарот во дискотеката „Пулс“, кој избувна на 16 март 2025 година за време на настап на групата ДНК, животот го загубија 63 лица, а повеќе од 200 беа повредени.
Судскиот процес го води судијката Дијана Груевска-Илиевска, додека обвинението го застапува тим составен од 15 јавни обвинители.
