Новата сезона во англиската Премиер лига стартува вечерва во 21 часот со дуелот меѓу актуелниот шампион Арсенал и новиот прволигаш Ковентри, а уште пред првиот свиреж е јасно дека следува сезона со многу промени, нови имиња и големи амбиции. Клубовите досега потрошија повеќе од 2,14 милијарди фунти за засилувања, а трансфер-пазарот сè уште не е затворен, што остава простор за уште големи зделки.
Арсенал во сезоната влегува како бранител на титулата и како еден од главните фаворити повторно да заврши на врвот. Тимот на Микел Артета ја задржа стабилноста на тренерската позиција и дополнително се засили со Бруно Гимараеш од Њукасл за 75 милиони фунти, Христос Цолис од Бриж за 34 милиони фунти и Пјеро Инкапи од Баер Леверкузен за 34,5 милиони фунти. Како резервен голман без обесштетување пристигна Илан Мелје, а клубот работи и на трансферот на Езри Конса од Астон Вила.
Од клубот заминаа Леандро Тросар, Јакуб Кивиор и Кристијан Нергор, но Арсенал и натаму располага со една од најцврстите одбрани во лигата. „Топчиите“ веќе испратија силна порака пред стартот на сезоната со победата од 3:0 против Манчестер Сити во „Комјунити шилд“.
Најголемиот предизвикувач повторно се очекува да биде Манчестер Сити, иако клубот минува низ голема транзиција по заминувањето на Пеп Гвардиола. Сити го доведе Елиот Андерсон од Нотингем Форест за 116 милиони фунти, а пристигнаа и Џереми Монга, Пирс Чарлс и Херонимо Рули. Во исто време заминаа Бернардо Силва, Џон Стоунс, Родри и Тијани Рејндерс. И покрај тоа, со Ерлинг Халанд во нападот и со играчи како Антоан Семењо, Жереми Доку, Рајан Шерки и Фил Фоден, Сити останува меѓу најсериозните кандидати за титулата.
Големи промени има и во Ливерпул. По заминувањето на Арне Слот, нов менаџер е Андони Ираола, а клубот го напуштија Мохамед Салах, Ибрахима Конате, Ендрју Робертсон и Кертис Џонс. Одбраната беше засилена со Жереми Жаке и Роналд Араухо, додека Виктор Муњоз пристигна во нападот. Ливерпул продолжува да бара уште офанзивни засилувања, а едно од главните имиња што се споменуваат е Бредли Баркола од ПСЖ.
Манчестер Јунајтед, под водство на Мајкл Карик, се враќа во Лигата на шампионите откако минатата сезона заврши трет со 71 бод. Во средниот ред пристигнаа Андреј Сантос и Јури Тилеманс, а клубот работи и на трансфер на Карлос Балеба. Маркус Рашфорд се врати од позајмицата во Барселона, додека Расмус Хојлунд беше продаден на Наполи, а Каземиро си замина како слободен агент.
Челси уште еднаш влегува во сезона со нов тренер, овојпат со Чаби Алонсо. Лондонскиот клуб повторно беше еден од најактивните на пазарот, а најголемо засилување е Морган Роџерс од Астон Вила за 117 милиони фунти. Пристигнаа и Максенс Лакроа, Марко Палестра и уште неколку нови фудбалери, додека во нападот Алонсо ќе може да смета на Кол Палмер, Жоао Педро и Педро Нето, доколку тој остане во клубот.
Тотенхем, сега предводен од Роберто Де Зерби, исто така направи голема реконструкција. Сандро Тонали пристигна од Њукасл за 100 милиони фунти, Матеуш Фернандеш за 85 милиони, а во тимот дојдоа и Ендрју Робертсон, Јан Пол ван Хеке и Маркос Сенеси. Без европски натпревари оваа сезона, Тотенхем ќе може целосно да се фокусира на домашното првенство.
Астон Вила повторно ќе се обиде да се вмеша во борбата за највисоките позиции, иако ги загуби Морган Роџерс и Јури Тилеманс. Тимот на Унаи Емери се засили со Жоао Гомеш, Јохан Манзамби, Алехандро Гарначо, Матео Руџери и Зион Сузуки. Њукасл, пак, почнува нова етапа со Матијас Јајсле по заминувањето на Еди Хау и продажбата на Бруно Гимараеш, Сандро Тонали и Ентони Гордон.
Новите прволигаши Ковентри, Хал Сити и Ипсвич исто така значително ги обновија составите во обид да обезбедат опстанок, додека Борнмут, Брентфорд, Брајтон и Фулам ќе се обидат да се вмешаат во борбата за европските позиции.
Пред стартот на сезоната, суперкомпјутерот на „ОПТА“ му дава најголеми шанси токму на Арсенал да ја одбрани титулата. Според пресметките, тимот на Артета има 38 проценти шанса повторно да биде шампион. Манчестер Сити е втор со 20,5 проценти, Ливерпул има 9,2 проценти, Манчестер Јунајтед 6,2 проценти, а Астон Вила 4,8 проценти.
Артета воедно има можност да стане само четвртиот менаџер во ерата на Премиер лигата кој успеал да ја одбрани титулата со ист клуб. Сепак, прогнозите не се гаранција, што најдобро го покажува минатата сезона, кога истиот модел му даваше 28 проценти шанса на Ливерпул, а клубот на крајот заврши на петтото место.
Покрај промените во составите, новата сезона носи и четири нови правила. Играч на кој му се укажувала медицинска помош ќе мора да помине една минута надвор од теренот пред да се врати во игра, со цел да се намали намерното задржување на времето.
Судиите ќе можат да одбројуваат пет секунди при изведување аут или гол-аут доколку проценат дека играчите намерно го одолговлекуваат продолжувањето на играта. Ако аутот не биде изведен навреме, топката ќе му припадне на противникот, а при доцнење со гол-аут противничкиот тим ќе добие корнер.
За замените е воведен рок од 10 секунди. Ако играчот што излегува го надмине тој период, неговата замена нема веднаш да може да влезе, туку ќе мора да почека до следниот прекин откако ќе помине една минута.
Промена има и кај ВАР. Видео-технологијата ќе може да интервенира во ситуации во кои играч добил втор жолт картон и бил исклучен. Проверката ќе важи само кога вториот жолт веќе е покажан, а ВАР нема да интервенира ако судијата воопшто не доделил втор жолт картон.
Со огромни вложувања, нови тренери, многу променети состави и нови правила, Премиер лигата влегува во сезона во која Арсенал ја брани титулата, но Манчестер Сити, Ливерпул, Манчестер Јунајтед, Челси и останатите претенденти ќе се обидат уште од првото коло да покажат дека борбата за врвот ќе биде далеку од едноставна.
