Специјалниот претставник на рускиот претседател за инвестиции и економска соработка со странство, Кирил Дмитриев, саркастично ѝ предложи на Канада да го реши трговскиот спор со Соединетите Американски Држави така што ќе стане американска сојузна држава, објави ТАСС.
„Едноставно станете 52-та држава и опуштете се“, напиша Дмитриев на англиски јазик на платформата X.
Во коментарите под објавата тој дополнително се осврнал и на Гренланд, посочувајќи дека и оваа територија би можела да стане американска држава.
Неговата реакција следувала по објавата на канадскиот премиер Марк Карни, кој соопштил дека Отава ги прекинува трговските преговори со Вашингтон и ќе воведе реципрочни царини за американски производи во ист обем.
Трговскиот претставник на САД, Џејмисон Грир, претходно изјавил дека канадската влада го одбила договорот што Вашингтон го сметал за поволен и дека американски царини од 50 проценти за одредени канадски производи ќе стапат во сила во сабота.
Карни потврдил дека преговорите се стопирани и најавил контрамерки со цел, како што навел, да се заштитат канадските работници и бизниси. Според најавите, реципрочните царини би требало да почнат да се применуваат од 8 септември.
Во истиот извештај се наведува и дека американскиот државен секретар Марко Рубио во петокот разговарал со канадската министерка за надворешни работи Анита Ананд за економските односи меѓу двете земји.
Претходно беше објавено дека САД и Канада постигнале ново трговско спогодување со кое било избегнато воведувањето дополнителни царини.
Американскиот претседател Доналд Трамп во средата соопштил дека Вашингтон и Отава постигнале трговски договор, додека еден ден претходно најавил тридневна пауза во примената на 50-процентните царини за канадски производи.
Според Bloomberg, кој се повикува на извори запознаени со договорот, една од точките предвидува САД да ги намалат за половина царините за канадскиот челик и алуминиум.
На таа позадина, Дмитриев со својата саркастична порака го вмеша и прашањето за територијалното проширување на САД, алудирајќи и на претходните идеи поврзани со Гренланд.
