Уште во 1922 година, македонските иселеници во Соединетите Американски Држави организирале јавни демонстрации посветени на македонското прашање, барајќи независност и обединување на Македонија.
Протестите биле организирани во периодот кога македонската емиграција во САД започнувала посилно политички да се организира. Истата година во Форт Вејн била основана Македонската патриотска организација (МПО), која станала една од позначајните организации на македонската дијаспора во Северна Америка.
На демонстрациите македонските иселеници истакнувале пораки за „Обединета Македонија“ и за независност, изразувајќи противење на поделбата на македонската територија по Балканските војни.
Особено впечатлив е слоганот „INDEPENDENCE FOR MACEDONIA“ – „Независност за Македонија“, кој се појавува и на историските фотографии од активностите на македонската дијаспора.
Една од фотографиите го прикажува македонскиот пилот Ангел Александров (Gel Alexandroff) пред својот авион, на кој е испишана токму пораката „INDEPENDENCE FOR MACEDONIA“.
Фотографијата е направена за време на 12-тата годишна конвенција на Македонската патриотска организација во Детроит. Александров решил на конвенцијата да пристигне со својот авион, наместо со вообичаените превозни средства, со што сакал да привлече дополнително внимание од американската јавност и медиумите кон македонското прашање.
Историските фотографии и снимки денес сведочат за активностите на македонските иселеници во САД во првите децении на 20 век и за нивните напори преку јавни собири, протести и симболични пораки да го привлечат вниманието кон идејата за независна Македонија.
…
