Хрватските власти спроведуваат обемна истрага откако во саботата попладне и вечерта биле пронајдени четири мртви тела во реките Купа и Мрежница во близина на Карловац.
Според информациите што ги пренесуваат хрватските медиуми, првата пријава била добиена вчера попладне, кога граѓанин ја известил полицијата дека забележал мртво тело во реката Купа во близина на населбата Срачак, во општина Рибник.
На местото веднаш излегле полициски службеници од полициската станица Озаљ, а припадници на хрватските спасувачки служби го извлекле телото на непознат маж од реката. По извлекувањето бил извршен увид на местото на настанот.
Само неколку часа подоцна, хрватската полиција добила известување од Словенечка полиција дека во реката Купа, во селото Горни Прилишќе во општина Нетретиќ, биле забележани уште две тела на непознати мажи.
Полициски службеници од полициската станица Дуга Реса, заедно со пожарникари од Словенија, ги извлекле телата на брегот, по што повторно бил спроведен увид.
Драмата продолжила и во вечерните часови, кога граѓани пријавиле уште едно мртво тело, овојпат во реката Мрежница во селото Горни Звечај.
Телото на уште еден непознат маж било извлечено од реката од припадници на хрватската спасувачка служба, по што полицијата започнала нова истрага на терен.
Од Полициска управа Карловац соопштија дека се спроведуваат дополнителни криминалистички истраги и обдукции со цел да се утврдат идентитетот на жртвите и точната причина за смртта.
Сите тела биле пренесени на судска медицина за обдукција и идентификација.
Хрватските медиуми наведуваат дека полицијата ќе проверува дали случајот е поврзан со неодамнешната трагедија во близина на Горни Прилишќе, кога четворица нелегални мигранти загинаа, а уште двајца беа тешко повредени.
Тој случај ја потресе хрватската јавност на 3 мај, кога телата на четворица мигранти беа пронајдени на ливада во Долни Прилишќе, додека двајца преживеани мигранти биле затекнати во тешка здравствена состојба.
Полицијата засега не открива повеќе детали, а истрагата треба да утврди дали пронајдените тела се поврзани со мигрантски рути, криумчарење луѓе или други околности.
