Најмалку седум лица загинаа, а по уште 23 се трага откако патнички траект се преврте во близина на брегот на Северен Кипар.
На траектот „Филоџет“ се наоѓале 267 лица – 259 патници и осум членови на екипажот. Спасувачките екипи досега извлекле 237 луѓе, додека операцијата за пронаоѓање на исчезнатите продолжува.
Пловилото тргнало од пристаништето Киренија, познато и како Гирне, кон турското пристаниште Ташуџу во провинцијата Мерсин. Само петнаесетина минути по испловувањето, на околу четири наутички милји од брегот, траектот почнал да прима вода и набргу се превртел.
На драматичните снимки објавени на социјалните мрежи се гледаат патници со спасувачки елеци во морето, како и луѓе кои чекаат помош во близина на превртеното пловило.
Во спасувачката операција се вклучени крајбрежната стража, хеликоптери, спасувачки бродови, рибарски чамци и други цивилни пловила. Повредените се пренесени во болници, додека здравствените установи во регионот се ставени во состојба на зголемена подготвеност.
Властите формираа кризен штаб и соопштија дека сите расположливи ресурси се насочени кон пронаоѓање на исчезнатите. Првичните информации упатуваат дека траектот се соочил со неповолни временски услови, но точната причина за несреќата сè уште не е официјално утврдена.
Првичните медиумски извештаи наведуваа дека на бродот имало 279 лица, но надлежните подоцна ја коригираа бројката на 267.
