Во централна Грција, полицијата уапси осум лица, шест мажи и две жени, осомничени дека се дел од групата што вчераутро изврши вооружен грабеж на банкарска филијала во регионот Фтиотида, при што беа однесени околу 200.000 евра.
Според информациите од грчките истражни органи, акцијата за нивно приведување се случила истиот ден попладне, по интензивна полициска операција. Кај дел од осомничените биле пронајдени и запленети тешко вооружување, меѓу кое рачни бомби, полуавтоматски пушки и пиштоли, што дополнително ја зајакнува верзијата дека станува збор за организирана и добро вооружена криминална група.
Министерот за заштита на граѓаните, Михалис Хрисохоидис, во изјава за државната телевизија „ЕРТ“ истакна дека групата не била непозната за полицијата и дека подолг период била под надзор поради сомнежи за нивна вмешаност во повеќе грабежи, меѓу кои еден посериозен и неколку помали случаи.
Од полицијата дополнително појаснија дека осомничените се на возраст од 24 до 33 години и дека дел од нив биле приведени само неколку часа по самата акција. Во јавноста беше истакнато и дека групата немала никаква поврзаност со местото на грабежот, туку најверојатно ја одбрала филијалата поради слабата полициска покриеност и фактот што најблиската станица би реагирала со задоцнување од најмалку петнаесет минути.
Самата акција, според реконструкцијата на настаните, била изведена брзо и координирано: маскирани напаѓачи упаднале во банката во утринските часови, ги принудиле присутните да легнат на подот и под закана со оружје ја презеле контролата врз објектот. Еден од нив, вооружен со автоматско оружје, ги држел вработените и клиентите под закана, додека друг бил спроведен во подрумските простории каде што се наоѓале сефовите. Таму биле земени парите.
По грабежот, уште еден член од групата се појавил на излезот од банката за да обезбеди бегство, исто така вооружен, додека надвор ги чекало возило управувано од соучесник, со кое целата група веднаш побегнала од местото на настанот.
…
