Српски државјанин е казнет со вкупно 3.000 евра откако во два наврати бил фатен како вози со повеќе од двојно поголема брзина од дозволената на автопатот А1 кај Демир Капија.
Како што информира Основното јавно обвинителство Кавадарци, станува збор за 34-годишниот Д.П., кој добил две парични казни од по 1.500 евра за кривичното дело „безобѕирно управување со моторно возило“.
Тој бил приведен на 29 август околу 23:20 часот на граничниот премин Табановце, при обид да ја напушти државата. При полициската проверка на возилото „Шкода“ со српски регистарски ознаки, преку системот „Безбеден град“ било утврдено дека Д.П. претходно двапати бил регистриран при возење со исклучително висока брзина.
На 22 јули, во близина на Демир Капија, тој возел со брзина од 163 километри на час, додека на 20 август, на истата делница, бил регистриран како вози со 169 километри на час.
Во двата случаи, на делницата важело ограничување на брзината од 80 километри на час.
По приведувањето на Табановце, Д.П. бил спроведен во Полициската станица во Неготино за понатамошна постапка.
…
