Рускиот претседател Владимир Путин наредил руските сили во период од три дена да не изведуваат напади врз Киев, со почеток од полноќ, соопшти портпаролот на Кремљ, Дмитриј Песков. Одлуката, според Кремљ, е поврзана со претстојните посети и разговори на американските претставници Стив Виткоф и Џаред Кушнер во Москва и Киев.
Песков потврди дека Путин ќе се сретне со Виткоф и Кушнер во Москва, а двајцата американски пратеници потоа треба да отпатуваат во Киев, каде што се очекува средба со украинскиот претседател Володимир Зеленски.
„Рускиот претседател и врховен командант Путин издаде наредби руските сили да се воздржат од напади врз Киев три дена, почнувајќи од денес“, изјави Песков, додавајќи дека паузата е поврзана со подготовката и одржувањето на состаноците со американските претставници.
Одлуката доаѓа во момент кога Вашингтон повторно се обидува да ги придвижи мировните преговори за Украина. Американскиот претседател Доналд Трамп претходно изјави дека Виткоф и Кушнер во Москва и Киев носат предлог за ставање крај на војната.
Според последните информации, паралелно со руската одлука е договорена и привремена пауза во украинските воздушни напади врз Москва за време на посетите на американските пратеници.
Сепак, Песков посочи дека засега нема информации за нови конкретни идеи за решавање на конфликтот, што укажува дека дипломатските напори сè уште се во рана и неизвесна фаза.
…
