Иако на одредени делови од германските автопати нема општо ограничување на брзината, голем број возачи сепак се движат со околу 130 километри на час. Причините се поврзани со препораките, одговорноста при сообраќајки, правилата за службените автомобили, но и со потрошувачката на гориво.
Во Германија постои таканаречената „Richtgeschwindigkeit“ – препорачана брзина од 130 км/час. Таа не е задолжителна на делниците каде што нема поставено ограничување, но надминувањето на оваа брзина може да има последици при сообраќајна несреќа.
Доколку возачот се движи со над 130 км/час и дојде до несреќа, во одредени околности може да биде земена предвид неговата брзина при утврдувањето на одговорноста за настанатата штета.
Дополнително, сè повеќе компании воведуваат сопствени ограничувања за службените возила. Најчесто максималната брзина е поставена на 130 км/час, меѓу другото поради намалување на потрошувачката на гориво и трошоците за одржување на возниот парк.
Организациите Agora Verkehrswende и Öko-Institut имаат објавено препораки за компаниите во кои се наведува дека ограничувањето на брзината може да придонесе за намалување на потрошувачката на гориво и поголема одржливост.
Некои германски институции имаат поставено и построги правила. Landesamt für Finanzen Nordrhein-Westfalen препорачува службените автомобили на автопат да не надминуваат 110 км/час.
Кај возилата на BwFuhrparkService, компанијата која управува со значителен дел од возниот парк на германската армија, е наведено ограничување од 130 км/час. Според извештаи, почитувањето на правилата во одредени случаи се следи и преку телеметрија.
Важен фактор е и економичноста. При високи цени на горивото, возењето со поголема брзина значително ја зголемува потрошувачката, па за дел од возачите дополнителните километри на час едноставно не се исплатливи.
Така, иако на дел од германските автопати возачите законски можат да возат и значително побрзо, брзината од околу 130 км/час за многумина претставува практичен баланс меѓу времето на патување, потрошувачката, трошоците и безбедноста.
…
