Американскиот претседател Доналд Трамп го отфрлил предлогот на Иран за седумдневен прекин на непријателствата и повторно отворање на Ормуската Теснина, објави „Волстрит журнал“, повикувајќи се на американски официјални лица запознаени со ситуацијата.
Според наводите, Трамп на своите соработници им кажал дека очекува американските напади врз Иран да продолжат и по изборите за Конгресот во ноември.
Во меѓувреме, иранскиот министер за надворешни работи Абас Арагчи потврди дека Техеран преку Катар доставил конкретен седумдневен план до американската страна.
Според предлогот, доколку бидат исполнети договорените услови, Ормуската Теснина би била повторно отворена во рок од седум дена, по што би продолжиле дипломатските разговори за спорните прашања и иранската нуклеарна програма.
Планот, според достапните информации, предвидува прекин на непријателствата, намалување на американскиот притисок врз Иран и продолжување на преговорите. Во него, наводно, се опфатени и барања поврзани со укинување на поморската блокада и ублажување на санкциите врз извозот на иранска нафта.
Арагчи објаснил дека подготовките за повторно отворање на Ормуската Теснина би започнале на шестиот ден, додека нормализирањето на пловидбата би можело да започне на седмиот ден. Паралелно со тоа би продолжиле дипломатските разговори.
Ормуската Теснина претставува една од најважните светски поморски рути за транспорт на нафта и други енергенси, поради што секое ограничување на пловидбата има пошироки последици за меѓународните енергетски пазари.
Одбивањето на иранскиот предлог дополнително ја зголемува неизвесноста околу можноста за прекин на непријателствата и продолжување на дипломатските преговори меѓу Вашингтон и Техеран.
…
