Полицијата приведе 16 лица во Скопје, Тетово, Гостивар, Штип, Кавадарци и на граничниот премин Табановце во одделни случаи поврзани со пронајдена дрога. Меѓу приведените е и одговорно лице во спортска обложувалница, осомничено за овозможување употреба на опојни дроги.
На 3 и 4 октомври, на различни локации во Скопје, полициски службеници ги привеле Г.П. (21), С.Б. (37), М.Х.З. (39), С.М. (19) и 17-годишна девојка, сите од Скопје. Приведени се и М.И. (38) од Велес, Х.Д. (25) од Гостивар и Е.С.Е. (22) од Турција. Според МВР, при преглед кај нив биле пронајдени и одземени марихуана и бела прашкаста материја.
Во Тетово на 3 октомври, во 16:45 часот, на улицата „Киро Ристоски-Дрнц“ бил приведен Л.А. (36). Полицијата соопшти дека кај него нашла две пакувања кокаин и кујнски нож.
Истата вечер, во 22 часот, во спортска обложувалница на улицата „120“ во Тетово бил приведен К.А. (34), кај кого бил пронајден предмет со остатоци од кокаин. Во врска со случајот полицијата го привела и одговорното лице во објектот, С.Р. (62) од селото Челопек. Тој е осомничен за кривичното дело „овозможување употреба на опојни дроги“ според член 216 од Кривичниот законик.
Во Гостивар, на 4 октомври во 1:20 часот, на улицата „Иво Лола Рибар“ бил приведен С.А. (29), кај кого полицијата пронашла пакување кокаин. Во Штип, претходната вечер во 23:45 часот, биле приведени А.Ѓ. (22) и В.И. (24), двајцата од градот, откако при преглед кај нив биле пронајдени грутчеста материја и марихуана.
На граничниот премин Табановце, на влез во државата, на 3 октомври во 21:30 часот бил приведен Ј.М. (37) од Чешка. Марихуана била пронајдена во неговиот личен багаж во возило со чешки регистарски ознаки.
Во истото време во Кавадарци бил приведен и А.Г. (31) од градот, кај кого при преглед била пронајдена марихуана. Акцијата ја спровеле полициски службеници од Полициската станица за граничен надзор Михајлово во координација со Регионалниот центар за гранични работи Југ.
Од МВР најавуваат дека по целосно документирање на одделните случаи ќе следуваат соодветни поднесоци.
