Разбиена е меѓународна криминална група осомничена за нелегална трговија со дрога, а во акцијата се приведени пет лица, информираат надлежните институции.
Против петтемина е поднесена кривична пријава за неовластено производство и пуштање во промет на наркотични дроги, психотропни супстанции и прекурсори.
Случајот започнал по добиена разузнавачка информација од Одделението за разузнавање. Потоа, мобилните тимови на Одделението за оперативни работи на граничниот премин Дојран, при излез од државата, спречиле транспорт на 79 килограми марихуана.
Според информациите, дрогата била наменета за турскиот пазар. Марихуаната била запленета, а возачот, државјанин на Босна и Херцеговина, бил приведен.
По заплената, во координација со Обвинителството за гонење организиран криминал и корупција, била спроведена предистражна постапка со цел да се утврди кој сè бил вклучен во нелегалниот транспорт и трговијата со дрога.
Преку понатамошни разузнавачки и оперативни активности биле идентификувани и други лица поврзани со случајот, по што следеле приведувањата и поднесувањето на кривичните пријави.
Од надлежните институции посочуваат дека продолжуваат со активности насочени кон сузбивање на организираниот криминал и нелегалната трговија со наркотични средства.
…
