Директорот на подружницата „Црн Бор“ во Прилеп и вработена во подружницата „Бабуна“ во Велес биле приведени во рамки на одделни постапки за сомнежи за незаконско постапување со дрвна маса. Ова го соопшти заменик-директорот на ЈП „Национални шуми“, Кире Михаилов.
За случајот во Велешко, полицијата претходно информираше дека на 7 октомври во селото Теово биле лишени од слобода три лица, меѓу кои и вработена во јавното претпријатие. Притоа биле одземени дрва и други предмети поврзани со случајот.
Михаилов наведе и дека во друга постапка била поднесена кривична пријава против вработен во подружницата во Свети Николе и против правно лице. Според неговите информации, проценетата штета во тој случај надминува 50.000 евра.
Во изминатите денови се спроведувале и акции за одземање возила и огревно дрво. Од правно лице во Скопско биле одземени околу 400 кубни метри дрво, со проценета вредност од околу два милиони денари, односно над 30.000 евра.
Според Михаилов, на оваа акција ѝ претходела десетдневна истрага, а била спроведена во координација со обвинителството, Министерството за внатрешни работи и Шумската полиција.
Тој посочи дека досегашните информации упатуваат на можно дејствување на организирана група поврзана со нелегален превоз и продажба на дрва. Се проверуваат индиции за активности на повеќе подрачја, од Скопска Црна Гора и Китка до Гостивар и Велес, како и евентуална вмешаност на лица од институциите.
Во своите објави Михаилов порача дека нема да има поделба на „наши“ и „ваши“ и дека секој што го прекршил законот треба да одговара.
…
