Европските земји треба сериозно да ја сфатат можноста за воен конфликт со Русија и навреме да се подготват, порача поранешниот врховен командант на украинските вооружени сили, Олександр Сирски, во интервју за Би-Би-Си.
Обраќајќи им се на европските партнери што се сомневаат во натамошните територијални амбиции на Москва, тој ги повика да ги отфрлат илузиите дека такво сценарио не може да се случи.
Сирски истовремено оцени дека Украина ја стабилизирала линијата на фронтот и ја ограничила способноста на руските сили да напредуваат. Според него, за тоа придонеле технолошкиот развој, нападите врз слабите точки на руските позиции и загубите нанесени на противничките сили.
Тој тврди дека вкупните руски загуби се шестпати поголеми од украинските, а бројот на загинати до 11 пати поголем. Овие процени не можат независно да се потврдат.
Говорејќи за иднината на војувањето, генералот предвиде сè поголема употреба на роботи, автоматизирани системи и вештачка интелигенција. Сепак, смета дека технологијата нема целосно да ги замени луѓето, чија улога ќе остане клучна во управувањето со вооружувањето.
Во интервјуто се осврна и на несогласувањата со тогашниот министер за одбрана Михајло Федоров. Според Сирски, при набавките се давала предност на дроновите, додека други потреби на фронтот, меѓу кои копнени беспилотни возила, пикапи и мотоцикли, останувале недоволно покриени.
Тој ги отфрли критиките дека не ја приспособувал војската на технолошките промени, наведувајќи дека за време на неговиот мандат значително се проширила употребата на дронови, вклучително и за напади длабоко зад руските линии.
Сирски призна дека имало ситуации во кои украинските повлекувања следувале доцна, но нагласи дека земјата се соочува со противник со значително поголеми воени ресурси.
Го бранеше и упадот во руската Курска област од август 2024 година. Според него, операцијата ја принудила Москва да пренасочи сили и ѝ овозможила на Украина време за закрепнување на исцрпените бригади.
….
