Кривична пријава против 20-годишниот Е.А. од Голема Речица е поднесена по координирана истрага на МВР и американското Федерално истражно биро. Тој е осомничен дека администрирал онлајн-платформа преку која се продавале украдени лични податоци, податоци за пристап до сметки и алатки за компјутерски криминал.
Пријавата до Основното јавно обвинителство Тетово се однесува на сомнежи за компјутерска измама, злоупотреба на лични податоци и производство и дистрибуција на детска порнографија.
Според МВР, истрагата започнала по информации добиени од ФБИ. Обезбедените докази укажуваат дека Е.А. од 2023 до 2025 година администрирал домени и веб-страници поврзани со нелегалниот пазар OLVX.
На платформата се нуделе украдени дигитални податоци, софтверски алатки и услуги наменети за криминални активности. Според полицијата, биле понудени повеќе од 1.500 украдени пристапни акредитиви за кориснички сметки и компјутерски мрежи.
МВР наведува дека пријавениот во периодот од 2025 до 2026 година администрирал и група на Телеграм наречена ONEMILI. Преку неа, според истрагата, се нуделе алатки и услуги за компјутерски криминал, вклучително и измами со незаконско враќање парични средства.
Полицијата соопшти дека обезбедила и докази за набавување и поседување материјали со сексуална злоупотреба на деца преку Телеграм.
Од Министерството ја опишуваат акцијата како прва заедничка координирана сајбер-операција на МВР и ФБИ, истакнувајќи ја важноста на меѓународната соработка во сузбивањето на компјутерскиот криминал.
…
