Триесет и шестгодишен маж е уапсен во Белград под сомнение дека со месеци им приоѓал на жртвите од зад грб и им ги кинел ланчињата од вратот, а потоа ги продавал. Според српското Министерство за внатрешни работи, со овие дела се стекнал со противправна имотна корист од над 1,2 милиони динари, односно околу 10.200 евра.
П.Ј. (36) бил уапсен од припадници на Полициската станица „Нови Београд“, во соработка со Третото основно јавно обвинителство во Белград. Постојат основи за сомневање дека извршил едно разбојништво и 12 тешки кражби на особено опасен и дрзок начин, се наведува во денешното соопштение на српското МВР.
Делата за кои се сомничи биле извршени на територијата на Нов Белград, во периодот од јуни до октомври 2026 година. Според полицијата, осомничениот ги одземал ланчињата со нагло кинење од вратот на жртвите, по што, како што се сомневаат истражителите, ги продавал.
При постапувањето, полициските службеници кај него пронашле и одзеле предмети за кои постои сомнение дека потекнуваат од пријавените кривични дела.
По налог на јавен обвинител од Третото основно јавно обвинителство во Белград, на П.Ј. му е одредено задржување до 48 часа. Потоа, со кривична пријава, ќе биде изведен пред надлежното обвинителство.
