Деветнаесетгодишниот македонски државјанин Хамза Дарлишта останува во притвор во Бугарија поради обвинение за обид за пренесување фалсификувани банкноти со вкупна номинална вредност од 98.500 евра преку граничниот премин „Капитан Андреево“.
Окружниот суд во Хасково на 23 октомври му ја одредил мерката притвор, оценувајќи дека постои опасност од бегство, објави Бугарската телеграфска агенција, повикувајќи се на соопштение од судот.
Случајот датира од 19 октомври, кога царинските службеници извршиле проверка на бугарско-турската граница. Во поставата на јакната што ја носел младиот државјанин биле пронајдени 300 банкноти од по 200 евра и 385 банкноти од по 100 евра.
Станува збор за вкупно 685 банкноти, за чие пренесување тој е обвинет пред бугарските надлежни органи.
При одлучувањето за притворот, судот направил разлика меѓу опасноста обвинетиот да изврши ново кривично дело и ризикот да се сокрие. Според судската оценка, првата опасност не е утврдена, но постојат околности што укажуваат на можност за бегство.
Како причини биле наведени сериозноста на обвинението, неговото странско државјанство и фактот што нема постојана адреса и траен престој на територијата на Бугарија.
Одлуката за притвор може да биде обжалена пред Апелацискиот суд во Пловдив. Притворот е процесна мерка и не претставува пресуда за вина.
ВИДЕОТО МОЖЕТЕ ДА ГО ПОГЛЕДНЕТЕ ТУКА
