Возач од Скопје заработи санкција откако на социјалните мрежи се појави видео на кое се гледа како со автомобил се движи по велосипедска патека на улицата „Бутелска“. Полицијата реагирала по објавувањето на снимката и го идентификувала прекршителот.
Како што информира Министерството за внатрешни работи, на социјалната мрежа ТикТок било објавено видео на кое се гледа патничко возило „сузуки“, со скопски регистарски ознаки, како се движи по велосипедска патека покрај улицата „Бутелска“ во Скопје.
Возилото се движело во правец од кружниот тек кон крстосницата со булеварот „Босна и Херцеговина“.
По објавувањето на видеото, полициските службеници од Одделението за безбедност на патниот сообраќај при СВР Скопје веднаш презеле мерки за утврдување на идентитетот на лицето зад воланот.
По спроведените проверки било утврдено дека станува збор за Н.К. (46) од Скопје.
Возачот на 28 октомври бил повикан на службен разговор, по што бил соодветно санкциониран за сторениот сообраќаен прекршок.
Според МВР, прекршокот се однесува на управување моторно возило по сообраќајна површина што не е наменета за таков вид сообраќај.
Од Министерството за внатрешни работи потсетуваат дека сите учесници во сообраќајот се должни да ги почитуваат сообраќајните правила и прописи.
Особено е важно да не се загрозува безбедноста на велосипедистите, пешаците и останатите учесници во сообраќајот.
Случајот покажува дека видеоснимките објавени на социјалните мрежи можат да послужат како повод полицијата да преземе мерки и да утврди одговорност за сообраќајни прекршоци.
ВИДЕОТО МОЖЕТЕ ДА ГО ПОГЛЕДНЕТЕ ТУКА
…
