Студентската субвенција за оброк би можела да порасне од сегашните околу 3.500 на 4.500 денари месечно. Владата најавува и дополнителни попусти за студентите при купување храна, но предложениот модел допрва треба да биде разгледан со студентските претставници.
Премиерот Христијан Мицкоски соопшти дека субвенцијата би се користела преку посебната услуга „М-студентски оброк“, која би била дел од апликацијата „М-услуги“.
Со средствата студентите би можеле да купуваат храна и пијалаци во рестораните, маркетите и млечните ресторани вклучени во системот. Купувањето алкохол и цигари не би било дозволено, бидејќи субвенцијата е наменета за студентски оброк.
Владата планира да разговара со трговците за попусти што би важеле и откако студентите ќе го потрошат месечниот износ на субвенцијата.
Предлогот ќе им биде претставен на студентските парламенти, чии претставници треба да разговараат со студентите и да се изјаснат за моделот. За неговото воведување ќе бидат потребни развој на софтверско решение и спроведување тендерска постапка.
Мицкоски најави и подобрување на условите во студентските домови. Реконструираниот дом „Кузман Јосифовски-Питу“ се очекува да биде пуштен во употреба до крајот на годината, а реконструкцијата на „Стив Наумов“ е во тек.
…
