Воведувањето администрација во Алта банка АД Битола е привремена мерка за заштита на штедачите, имотот и стабилноста на банката до очекуваната промена на сопственоста, порача гувернерот на Народната банка, Трајко Славески.
🛡️ Привремено ја заштитуваме „АЛТА банка“ АД Битола, нејзиниот имот и сите заштеди на граѓаните, до очекуваната промена на сопственоста.
🔹 Воведувањето администрација во банката е заштитна мерка од времен карактер – не значи затворање на Банката, стечај или одземање на дозволата за работа.
🔹 „АЛТА банка АД Битола“ е ликвидна, високо капитализирана и со солиден квалитет на кредитното портфолио. Работењето на Банката продолжува под непосреден супервизорски надзор на Народната банка, со привремени ограничувања.
💳 Средствата на клиентите остануваат на нивните сметки. За физичките лица е утврден неделен лимит од 10.000 денари за одлив преку картички за готовински подигања и плаќања кај трговци. Внатрешните плаќања во рамките на Банката остануваат неограничени.
🏢 Правните лица привремено нема да можат да одлеваат средства надвор од Банката преку платните системи, ниту со повлекување готовина од банкомати или шалтери. Ќе можат да вршат неограничени внатрешни плаќања кон други правни и физички лица во рамките на Банката.
🎯 Целта е јасна: да се заштитат сите штедачи, имотот и стабилноста на Банката до промената на сопственоста, која очекуваме да се реализира набрзо.
🏦 Народната банка континуирано ја следи состојбата и јавноста навремено ќе биде информирана за сите промени.
— Trajko Slaveski (@TSlaveski) November 2, 2026
Тој нагласува дека мерката не значи затворање на банката, отворање стечај или одземање на дозволата за работа.
Според Славески, Алта банка е ликвидна, високо капитализирана и има солиден квалитет на кредитното портфолио. Нејзиното работење продолжува под непосреден супервизорски надзор на Народната банка, со привремени ограничувања.
Средствата на клиентите остануваат на нивните сметки. За физичките лица е утврден неделен лимит од 10.000 денари за готовински подигања и плаќања кај трговци преку платежните картички. Внатрешните плаќања во рамките на банката остануваат неограничени.
Правните лица привремено нема да можат да префрлаат средства надвор од банката преку платните системи, ниту да подигнуваат готовина од банкомати или шалтери. Ќе можат да вршат неограничени плаќања кон други правни и физички лица што имаат сметки во истата банка.
Славески посочува дека промената на сопственоста се очекува наскоро, но во објавата не наведува конкретен рок.
Осврнувајќи се на наводите за прекугранични трансфери, гувернерот нагласува дека префрлањето средства меѓу држави само по себе не претставува сомнителна активност. За оцената, според него, се важни природата, основата и околностите на трансакцијата, како и нејзината законитост.
Тој уверува дека банкарскиот систем е стабилен и отпорен, а Народната банка постојано ги следи ликвидноста, капиталната позиција и изложеноста на ризици на банките.
Славески повика довербата во банкарскиот систем да се темели на проверени информации и факти, најавувајќи навремено информирање на јавноста за сите промени.
…
